Skrítið fólk er (oftast) skemmtilegt

Ég hef yfirleitt gaman af skrítnu fólki, í merkingunni fólki sem er ekki eins og fólk er flest!

Ég hef sömuleiðis gaman af því að tala við fólk sem er ekki sömu skoðunar og ég. Ég ber þannig virðingu fyrir svo gott sem öllum sem ekki eru sömu skoðunar og ég í pólitík. 

En þegar kosningar nálgast er eins og losni úr búrum og hælum sérkennilegur flokkur einstaklinga, sem ástundar skítkast og annan óþverraskap undir nafnleynd - vegur að fólki úr launsátri og eitrar andrúmsloftið með stæku hatri. Þetta er alls ekki bundið við eina stjórnmálaskoðun eða einn stjórnmálaflokk. Og mig grunar að þetta séu tiltölulega fáir veikir einstaklingar sem noti mörg dulnefni. Reyndar þora sumir að koma með ansi mergjaðan óþverraskap undir nafni - það er þó skárra.

Ég skora á alla bloggara sem fá þessi nafnlausu skítakomment við færslur sínar að henda öllum viðbjóði út og setja bann á IP-tölur viðkomandi. Ég hef aðeins tvisvar séð mig knúinn til að gera slíkt, en mig grunar að það gæti orðið oftar núna í aðdraganda kosninga.

Athugasemdir

[Páll A. Þorgeirsson, 30.3.2009 kl. 00:10]

Ég tek undir þessi orð þín.  Nafnleyndina ætti ekki að leyfa á blogginu.  Skítkastið segir meira um þann sem það ritar en þann sem því er ætlað og ég kippi mér lítið upp við það.

[Alma Jenny Guðmundsdóttir, 30.3.2009 kl. 00:49]

Sammála Friðrik. 

[Jóna Kolbrún Garðarsdóttir, 30.3.2009 kl. 02:02]

Þessvegna leyfi ég bara skráða notendur bloggsins á mínu bloggi, ég vil vita hverjir skrifa athugasemdir á mitt blogg. 

[Friðrik Þór Guðmundsson, 30.3.2009 kl. 07:50]

Ég vil auðvitað banna sem allra fæsta. Ef ég þarf að banna fleiri þá reikna ég með að hleypa þeim aftur inn EFTIR kosningar, þegar mesta brjálæði viðkomandi er vonandi yfirstaðið.