Einn allra vinsælasti bloggari landsins er...

Ég ákvað fyrir viku síðan að gera fjölmiðlafræðilega tilraun. Ég vildi kanna hvort ég gæti, með eigin málflutning einan að vopni, komið mér upp „vinsældarlistann“ á Moggablogginu. Og ekki verður annað sagt en að tilraunin hafi heppnast. Ég er núna 8. vinsælasti bloggarinn og verð kannski ofar eftir miðnætti.

Moggabloggið birtir lista yfir 50 vinsælustu bloggarana „síðastliðna 7 daga“. Undanfarið hafa 3 bloggarar borið höfuð yfir herðar annarra með ótrúlega mörgum heimsóknum á síður sínar; Áslaug Ósk Hinriksdóttir, Jóna Á. Gísladóttir og Stefán Friðrik Stefánsson. Þetta fólk er að fá til sín 1.500 til 2.500 gesti á dag. Það er frækilegur árangur að fá svo marga til að heimsækja bloggsíðu sína og lesa. Ég reiknaði ekki með að komast í þennan úrvalsflokk, en taldi að það myndi vera fjári góður árangur að komast í eitthvert af næstu sætunum með tilrauninni.

Ég byrjaði á fimmtudeginum fyrir viku. Ákvað að á næstu dögum myndi ég setja ýmsa mismunandi pistla á bloggið. Inn rötuðu pistlar um Mýrarhúsaskólamálið, kristilegt siðgæði, Hannes Hólmstein, heilbrigðiskerfið, umhverfismál, Kópvogska spillingu, Steiner-dóminn og einnig slengdi ég fram sleggjudómi um ferð 200 kennara til Kína og næstum því Tíbet. Allt var þetta með hinum ýmsu áherslum og þá ekki endilega mínum eigin! Fyrr í dag setti ég síðan inn kökuuppskrift til gamans. Og svo þessa „játningu“. Ég birtist á listanum fyrst í 31. sæti, fór síðan í stökki í 14. sæti, svo í 11. sæti og svo í 8. sæti.

Ég geri mér vonir um að tilraunin skili mér jafnvel aðeins ofar. Ég geri mér ekki vonir að yfirstíga Ofurbloggarana (vitringana?) þrjá, en eftir einn eða tvo daga vona ég að tilraunin hafi skilað mér upp fyrir hina yfirlýsingaglöðu og hvatvísu Nönnu Katrínu Kristjánsdóttur og að sjálfur Ómar Ragnarsson þurfi að játa sig sigraðan og að ég endi þá í ca. 6. sæti. Það myndi ég kalla vel heppnaða tilraun. Með lítilsháttar átaki varð ég að „einum vinsælasta bloggara landsins“.

Engin smápeð sem ég vippaði aftur fyrir mig. Dofri ofurgræni Hermannsson, Sóley Tómasdóttir, Ómar R. Valdimarsson, Anna vélstjóri, Jens Guð, Andrés Magnússon, Ólína Þorvarðardóttir og Einar Sveinbjörnsson, svo nokkrir séu nefndir.

Var betra heima setið en af stað farið? Hef ég með þessu gengið götuna til góðs? Skilar þessi tilraun einhverri þekkingu? Ekki hugmynd!

Mýrarhúsaskólamálið skilaði mörgum heimsóknum og athugasemdum (Asperger-nemandinn sem skellti rennihurð á kennara, dómur). Heilbrigðismálin og umhverfismálin fældu heldur frá. Sleggjudómurinn var vondur en kökuuppskriftin tryggði einn gest á mínútu að meðaltali um hríð. Augljóslega skiptir máli um hvað maður skrifar.

Ef einhver er móðgaður yfir því að ég geri bloggara landsins og blogglesendur að tilraunadýrum þá biðst ég afsökunar. Ég er hvorki að gera lítið úr þeim sem skrifa né þeim sem lesa bloggið. Mig langaði bara til að gera tilraun!

Listaröðun Moggans miðast við vikuinnlit en hér er listi dagsins með meðaltal daglegra gesta:

1. Áslaug Ósk Hinriksdóttir        aslaugosk.blog.is               2.379

2. Jóna Á. Gísladóttir                 jonaa.blog.is                    1.547

3. Stefán Friðrik Stefánsson      stebbifr.blog.is                  1.526

4. Jenný Anna Baldursdóttir      jenfo.blog.is                        972

5. Sneott Bergz                        hvala.blog.is                       967

6. Ómar Ragnarsson                 omarragnarsson.blog.is         898

7. Nanna K. Kristjánsdóttir        nanna.blog.is                      846

8. Friðrik Þór Guðmundsson      lillo.blog.is                          805

Athugasemdir

[Sveinn hinn Ungi (IP-tala skráð) 19.3.2008 kl. 15:54]

Góður!

Ég var einmitt að furða mig á þessum skrifum þínum um Mýrarhúsaskólamálið, en nennti ekki að fara að rífast. Enda hefur verið að koma smám saman hjá manni, sú háttvísi að kommenta frekar ef maður er sammála, heldur en standa í karpi.

[Jóhanna Magnúsar- og Völudóttir , 19.3.2008 kl. 15:54]

Til hamingju með frægðina  ...  það fæst ekkert án ,,hard work" .. augljóslega..

[Friðrik Þór Guðmundsson, 19.3.2008 kl. 16:04]

Hvað var furðulegt við skrif mín um Mýrahúsaskólamálið? Líklega vitrænustu skrifin í "tilrauninni"! Upplýst og fræðandi!

[Jenný Anna Baldursdóttir, 19.3.2008 kl. 16:05]

Ég er fyrir löngu búin að finna leiðina á toppinn og ástundaði hana grimmt á tímabili.  Fyrirsagnirnar geta komið fólki langt, hvað svo sem segja má um innihald blogga.  Nú blogga ég til að gleyma (djók).  Til hamingju með rísandi frægðarsól.

[DoctorE (IP-tala skráð) 19.3.2008 kl. 16:05]

Mig minnir að ég hafi komist í 8 sæti mest, ég er samt ekkert að spá í þessu NEMA þegar staffið á mbl.is vippar mér handvirkt út af "Heitar umræður" það er ég algerlega ósáttur við.

Ég gæti vel komið mér á toppinn á kannski 1-2 dögum með óheiðarlegum aðferðum sem ég nefni ekki hér.. maður verður að vera góður um páska.. ;)

[Heiða B. Heiðars, 19.3.2008 kl. 16:08]

Æi... þessi listi er náttúrulega grín! Ein af manneskjunum þarna á topp 8 setti inn hvorki fleiri né færri en 15 færslur bara í gær... jebb, ég taldi þær! Fannst meira en lítið skrýtið hvað ég lenti oft inn á þeirri síðu þegar ég klikkaði á fyrirsagnir!

Ég les aldrei Áslaugar-blogg... er bara ekki þessi týpa sem fæ eitthvað út úr því að lesa um hörmungar fólks sem ég þekki ekki baun.
Les alltaf Jenný og Jónu...
Forðast Stefán Friðrik eins og heitan eldinn og reyna að láta þessi einnar setningar fréttablogg hjá Snorra og fleirum að fara framhjá mér
Fullt af fólki hérna sem hefur eitthvað að segja en það er langt því frá að vinsældarlistinn leiði mann endilega þangað

[Friðrik Þór Guðmundsson, 19.3.2008 kl. 16:16]

"Með óheiðarlegum aðferðum" segir DoctorE. Er svoleiðis til! Það er svindl! Ég notaðist eingöngu við málflutninginn, en auðvitað reyndi maður að hafa fyrirsagnir og innganga lokkandi.

[Kristjana Bjarnadóttir, 19.3.2008 kl. 16:29]

Þetta er á margan hátt áhugaverð "tilraun". Niðurstaðan kemur mér ekki á óvart. Fréttablogg, heitar fyrirsagnir og það að blogga oft á dag skilar inn heimsóknum. Það sem kannski gleymist er að heimsókn þýðir ekki endilega að bloggið hafi verið lesið. Þó teljarinn tikki hratt er ekki þar með sagt að um sé að ræða áhugaverðan bloggara.

Tel reyndar margt af því sem þú hefur skrifað flokkast undir að vera áhugavert.

Hverju erum við sem bloggarar bættari þó teljarinn tikki?
Er það athyglin sem við þráum?
Ef svo þá athygli hverra?
Ég kýs frekar mikla athygli fárra en litla athygli margra, magn er ekki ávísun á gæði.

[Baldur McQueen (IP-tala skráð) 19.3.2008 kl. 16:51]

Verður maður ekki að segja "ég vissi þetta allan tímann?"

Hitt er annað mál (eftirá að hyggja) að þú hefðir aldrei getað haldið dampi. 

Þú vinnur heimavinnuna og bloggar með innihaldi.  Slík vinnubrögð er ekki hægt að viðhafa lengi með slíkum hraða - þú gerðir þá ekkert annað á meðan.

Svo er auðvitað spurning hvernig maður skilgreinir blogg.  Einn af bestu "bloggurum" landsins er eflaust valdsmaðurinn Jóhannes Björn - einmitt vegna þess að hann vinnur "bloggin" sín svo helv*** vel. 

Hans gullmolar koma e.t.v. sjaldnar - en lifa þeim lengur.

[Sveinn hinn Ungi (IP-tala skráð) 19.3.2008 kl. 16:58]

Varðandi þennan dóm þá taldirðu eðlilegt að ábyrgðin réðist af því hvort móðirin var tryggð eða ekki.

Það væri laglegt í umferðinni ef þannig regla gilti þar. Sá sem er í kaskó væri alltaf bótaskyldur, hvort sem hann er í rétti eða ekki.

[H.T. Bjarnason (IP-tala skráð) 19.3.2008 kl. 17:18]

Það er eitt að skrifa eitt gott innihaldsríkt blogg á dag og njóta vinsælda og annað að skrifa 10 innihaldslitlar endursagnir á fréttum Morgunblaðsins.  Mætti ég biðja um hið fyrrnefnda, takk.

[Friðrik Þór Guðmundsson, 19.3.2008 kl. 19:07]

Þakka áhugaverð komment. Verð þó að mótmæla orðum Sveins Pálssonar ("Varðandi þennan dóm þá taldirðu eðlilegt að ábyrgðin réðist af því hvort móðirin var tryggð eða ekki"), þau lýsa ekki því sem ég var að segja. Og H.T. Bjarnason: Þetta skot á Stefán Friðrik var óþarft!

[H.T. Bjarnason (IP-tala skráð) 19.3.2008 kl. 19:13]

Var ég að fjalla um St.Fr.?

[SeeingRed, 19.3.2008 kl. 19:16]

"Svo er auðvitað spurning hvernig maður skilgreinir blogg.  Einn af bestu "bloggurum" landsins er eflaust valdsmaðurinn Jóhannes Björn - einmitt vegna þess að hann vinnur "bloggin" sín svo helv*** vel.  "

Alveg sammála Baldri MacQeen um gæði skrifa Jóhannesar Björns, einn sá beittasti þó að hann bloggi ekki á moggabloggi.

[Friðrik Þór Guðmundsson, 19.3.2008 kl. 19:55]

Jón Valur - skemmtilegheit! Fyndið.

Annað ennþá fyndnara. Í færslunni leyfi ég mér þann galskap að kalla Nönnu Katrínu "hvatvísa" og "yfirlýsingaglaða".

Hún svarar mér fullum hálsi - í athugasemd færslunnar um kökuuppskriftina!!!! Og segir ókurteist af mér að tala um "hvötvísi". Hvað sannar betur hvatvísi en að svara fullum hálsi á röngum vettvangi með röng orð!?

[Gísli Ásgeirsson, 19.3.2008 kl. 20:20]

Skemmtilegt nýyrði, hvötvísi. Öllum er hollt að koma sér upp skopskyni.

[Brjánn Guðjónsson, 19.3.2008 kl. 20:21]

athyglisverð tilraun hjá þér. ég vissi nú ekki einu sinni af þessum vinsældarlista og veit ekki enn hvar hann er að finna.

mér þykir svo sem ekkert að þessari tilraun þinni, í þágu vísindanna , svo lengi sem það er bara tilraun. hinsvegar að blogga gagngert til vinsælda öllum stundum, þykir mér hallærislegt.

ég kýs heldur að tala frá hjartanu fyrir daufum eyrum, en að tala úr rassgatinu við miklar vinsældir.

[Freyr Ófeigsson (IP-tala skráð) 19.3.2008 kl. 20:29]

Af sjónarhóli dómara hafa skrif þín að undanförnu verið málefnaleg og upplýsandi.  Greinilegt er t.d. að þú hefur kynnt þér dómana áður en þú skrifaðir um þá. Það verður hins vegar ekki sagt um marga, sem skrifa mest  um dómsmál á netinu.  Ég vona að þetta sé ástæða velgengni þinnar, a.m.k. varð það til þess að ég fór að fylgjast með skrifum þínum.

Freyr Ófeigsson f.v. dómari.

[Jóna Á. Gísladóttir, 19.3.2008 kl. 20:37]

hahahaha Brjánn góður.

Athyglisverð könnun og mun skemmtilegri en aðrar sem gerðar hafa verið í sama tilgangi. Ég reyndar hélt að vinsældarlistinn breyttist bara einu sinni á sólarhring. Svona veit maður lítið

Hvötvís líst mér vel á. Finnst það geti verið notað í fleirtölu. Barnið er hvatvíst en börnin eru hvötvís.

[Matthías Ásgeirsson, 19.3.2008 kl. 20:46]

Moggablogg er ekki allur bloggheimur, bara einn kimi hans.

[Baldur Kristjánsson, 19.3.2008 kl. 23:09]

Þú ert fæddur sigurvegari og ert markverð persóna.  En vegna miklu dýpri þátta en þessara. En þú kannt þó að skrifa og það eitt skilar einhverju! kv. B

[Friðrik Þór Guðmundsson, 19.3.2008 kl. 23:16]

Ég þakka málefnaleg komment og auðvitað sérstaklega góð orð Freys Ófeigssonar. Dómarinn hefur talað, heyriði það? Mér finnst vissulega mjög gefandi að grúska í dómsmálum.

Jóna: Vinsældarlistinn ER bara birtur einu sinni á sólarhring. Brjánn; þetta var einmitt tilraun í þágu vísindanna. Niðurstöður hvað vinsældarlistann varðar voru jákvæðar; það er hægt með réttri blöndu af (að mestu röklegum) skrifum um málefni að þoka sér upp vinsældarlistann á Moggablogginu (önnur blogg eru til, ég veit, Matthías). Og afsakaðu Nanna Katrín galskapinn í þinn garð. 

[Friðrik Þór Guðmundsson, 19.3.2008 kl. 23:19]

Ég fagna séra Baldri, sem bættist við meðan ég var að skrifa síðasta komment. Fyrst dómarinn og svo núna presturinn. Ef læknir bætist við er aldrei að vita hvað gerist!

[Friðrik Þór Guðmundsson, 20.3.2008 kl. 01:36]

Bara for the record:

50 vinsælustu bloggarnir síðastliðna 7 daga

Sæti

Höfundur

Slóð

Vikuinnlit

Vikuflett.

Gestir/dag

IP-t./dag

1.

Áslaug Ósk Hinriksdóttir

aslaugosk.blog.is

19.303

29.327

2.336

2.049

2.

Jóna Á. Gísladóttir

jonaa.blog.is

11.892

19.371

1.506

1.316

3.

Stefán Friðrik Stefánsson

stebbifr.blog.is

11.777

17.110

1.522

1.403

4.

Jenný Anna Baldursdóttir

jenfo.blog.is

8.470

18.475

974

885

5.

Friðrik Þór Guðmundsson

lillo.blog.is

7.229

12.290

966

882

6.

Sneott Bergz

hvala.blog.is

7.217

9.752

960

884

7.

Ómar Ragnarsson

omarragnarsson.blog.is

6.726

12.450

886

851

8.

Nanna Katrín Kristjánsdóttir

nanna.blog.is

6.546

11.023

872

786

[Friðrik Þór Guðmundsson, 20.3.2008 kl. 01:37]

Úbs.

[Gunnlaugur B Ólafsson, 20.3.2008 kl. 11:15]

Til lukku með tilraunina. Þú ert kominn í 5. sæti í dag. Blogg tengd veikindum hafa lengi verið á toppnum. Fylgst með hetjulegri baráttu barna með alvarlega sjúkdóma. Kíkti á Nönnu, Stefán og Sneott. Þar er verið að setja inn um 10 færslur á dag og yfirleitt ekki frumlegar eða persónulegar. Stefán er þó oft með málefnalegar umræður um fréttir. Jenný og Jóna eru í sérflokki hvað þær geta náð einlægum og persónulegum færslum. Persónulega er ég aðdáandi Ómars af þeim sem eru nú í top 8. Hann er hrifnæmur og kemur því oft með frumlegar og persónulegar færslur, en oftar en ekki með miklu inntaki og þekkingu.

[Friðrik Þór Guðmundsson, 20.3.2008 kl. 12:49]

Ekki þykist ég hafa merkilegri sögu að segja en sjúkdómssögu barna með alvarlega sjúkdóma. Ég beygi mig auðmjúkur fyrir slíkri baráttu.

[Gunnar Th. Gunnarsson, 20.3.2008 kl. 13:18]

Vinsældalistinn  nær reyndar yfir 400 vinsælustu bloggara landsins, ef maður stillir á það á flipanum. Mér hefur tekist að komast á topp 30 með því að tala úr rassgatinu

[Friðrik Þór Guðmundsson, 20.3.2008 kl. 13:23]

Oj bara Gunnar. það hefur þá verið í 29 manna hópi!

[Gunnlaugur B Ólafsson, 20.3.2008 kl. 20:26]

Friðrik, svo virðist sem að þú sjáir út úr mínu innleggi að ég sé að gera lítið úr sjúkdómssögum. Það eru algjörlega þínar hugrenningar eða misskilningur.

[Emma Vilhjálmsdóttir, 20.3.2008 kl. 23:00]

Það gæti nú verið að vinsælustu bloggarar landsins séu annarstaðar en á moggablogginu.

[Friðrik Þór Guðmundsson, 21.3.2008 kl. 01:26]

Meinti það ekki svo Gunnlaugur, sá ekkert slíkt út úr innleggi þínu. Veit það, Emma og hef sagt það áður; það eru fleiri bloggheimar til en Moggabloggið. Aldrei haldið öðru fram.

[Róslín A. Valdemarsdóttir, 21.3.2008 kl. 01:54]

Bloggmaraþon, nýtt nafn á það..
Ekki ætla ég að taka upp á þessu, þar sem maður hefur ekki hundsvit á öllum þessum blessuðu málum sem á standa þessa dagana í fréttum og fjölmiðlum.
Til hamingju með afraksturinn!

[Sigurður Þór Guðjónsson, 21.3.2008 kl. 11:42]

Það er bara verst að vinsælustu bloggararnir eru yfirleitt þeir sem minnst hafa að segja. Bestu bloggararnir, að mínu viti, skemmtilegasta og frumlegasta fólkið, er svona númer 200.

[Lára Hanna Einarsdóttir, 21.3.2008 kl. 11:44]

Mjög athyglisverð tilraun - og umræða.

[Katrín Ósk Adamsdóttir, 21.3.2008 kl. 13:55]

Flott tilraun og til lukku með árangurinn

[Hugarfluga, 21.3.2008 kl. 14:11]

"High Five"

[Friðrik Þór Guðmundsson, 21.3.2008 kl. 14:18]

Hvernig væri að kommentera á umhverfismálin og heilbrigðismálin? Þakka annars lofgjörðir.

[Ásthildur Cesil Þórðardóttir, 21.3.2008 kl. 14:37]

Já skemmtileg tilraun hjá þér.  Fyrir mig skiptir það engu máli hvar ég er á vinsældarlista.  Ég geri þetta mest fyrir mig og þá sem eru mér nánir en ekki endilega nálægt.  Og svo hitti ég daglega fólk, fæ kveðjur og góðar óskir um að bloggið mitt gleðji og gefi fólki eitthvað.  Þá er mínum tilgangi náð.  Margir bloggarar eru frábærir og fræðandi, gefandi og góðir.  Ég vildi ekki vera án þessa félagsskapar, nú þegar ég hef komist í tæri við hann.  En hafðu þökk fyrir þennan skemmtilega leik.