Draugarnir í heiðarselinu (lokahluti)

Leið nú nokkur stund og kom þá loksins Guðmundur Guðlaugsson og má nærri geta hversu fegin Kristín varð. Ekkert er um það vitað hvort sveitungar Kristínar lögðu trúnað á sögu hennar og sumir sjálfsagt afgreitt þetta sem illan draum eða ofsjónir.

Þegar ég komst í tæri við frásögn þessa kom mér fyrst í hug stolt yfir að hafa fundið þarna alvöru ættar-drauga. Á mig runnu tvær grímur við að lesa hversu snautlega þeir hrukku undan þegar píslin hún Kristín vísaði þeim út. Hefðu þeir að ósekju mátt brjóta eitt húsgagn eða tvö til að undirstrika yfirnáttúrlega nærveru sína. En þetta er aðeins grínaktugir þankar.  Hitt vekur meiri athygli mína að Guðmundur þessi Guðlaugsson er sagður hafa verið í náinni frændsemi við Neðranesfeðgana. Ekki kemur fram hvers konar frændsemi þar átti við, en hún sem sé sögð náin.  Hermundarstaðir voru 7-8 kílómetra frá Helgavatnsseli, sem var norðanmegin inni í Þverárdalnum langt til heiða. Þangað áttu yfirleitt engir aðrir en íbúarnir leið, nema þá fjárleitarmenn. Reyndar segist svo til að það sé aðeins sem næst hálfs annars tíma gangur lausum manni frá Hermundarstöðum að selinu, en á hinn bóginn var myrkur að skella á þegar Guðmundur hefur haldið af stað til Kristínar.

Ef menn vilja á annað borð trúa því að draugar séu til eða einhvers konar andar eða sálir á flakki, þá sýnist mér nærtækast að draga þá ályktun að Helgi og Ásmundur hafi ekkert erindi átt við Kristínu út af fyrir sig. Öllu eðlilegri skýringu væri að finna í náinni frændsemi þeirra við Guðmund. Það verður reyndar að taka það fram að ég hef ekki getað staðfest um hvers konar frændsemi var að ræða. En hvað um það, það kemur glögglega fram að Guðmundur var miklum mun seinni á ferð en til stóð og hefur hann ef til vill lent í einhverjum erfiðleikum í myrkrinu á leiðinni. Kannski voru feðgarnir frændur hans einfaldlega að fylgja honum þannig að hann kæmist heill á leiðarenda. Það er mér ekki fráhverft að tileinka mér þessa útgáfu, frekar en að þeir feðgar hafi fyrirvaralaust farið að hvekkja einmana kvenpísl upp á heiði, sem þeir áttu ekkert sökótt við!

Athugasemdir

[bpm (IP-tala skráð) 7.11.2010 kl. 02:14]

Sæll

Ég hef orðið vitni að draugagangi  með 2 öðrum mönnum 

 þetta var í salthúsi gringavíkur veturinn  1978, þannig var að ég var á lyftara að vinna og var hann bremsulaus þegar ég byrjaði að vinna á honum  talaði ég við verkstjóran að ekki væri sniðugt að vera að nota hann svona innan um  fullt af fólki sagði hann að erfitt væri að fá viðgerð á verkstæði , ég bauðst til að gera við bremsurnar ef hann útvegaði varahluti tók hann vel í það , fórum við í það eitt kvöldið  ég og strákur sem heitir kristján úr kjósinni  gekk vel að laga lyftarann  og vorum við búnir um kl 23  verk stjórinn var með okkur heitir Gylfi er úr grindavík  fór hann að segja okkur sögur til að halda okkur aðeins lengur og altaf að líta á klukkuna ég vildi far að sofa hann bað okkur um að hinkra aðeins því að það kæmi maður umm hálf tólf  á slaginu hálf tólf opnaðist dyr á fiskmótökunni og heyrðum við að það steig maður inn og stappaði af sér snjóslabb og dæsti gekk inn salinn og  fildum við eftir hljóðinu  þegar hann gekk framhjá okkur svona sirka 3 m frá okkur þegar hann var næst okkur  svo allt í einu gufaði hljóðið upp  og varð þögn þá sagði verkstjórinn núna er hann kominn og sagði hann að þessi hefði hengt sig í húsinu fyrir nokrum áratugum  og hann kæmi altaf kl hálf tólf á hverjukvöldi , ég sagði ekki orð enn heyrði í draugsa eins og hinir þegar verkstjórinn sagði nú er hann kominn hvernig gat hann vitað hvað ég heyrði og kristján var mjög skelkaður

hitti hann 2006 og minti hann á kvöldið forðum og mundi hann vel eftir því 

kv Bjarni P Magnússon

[Friðrik Þór Guðmundsson, 7.11.2010 kl. 14:26]

Takk fyrir þetta innlegg Bjarni. Þetta er athyglisverð "birtingarmynd" af draugi; eins konar aðgerðarlaus og samskiptalaus "ímynd" eða minningarbrot sem birtist alltaf á sama tíma á sama stað og án tengsla við fólk í raunheimum. Sumir, sem ekki trúa á tilvist drauga, hafa einmitt bent á að hugsanlegt sé að atburðir sem áður gerðust og voru "sterkir" geti endurtekið sig í einhverju rafeinda-formi.

Fróðlegt væri að heyra fleiri dæmi af ólíkum "myndbirtingum".