Kjördæmi, persónukjör og nýja stjórnarskráin

 

 

Fundaröð Stjórnarskrár-

félagsins um frumvarp

að nýrri stjórnarskrá

Kjördæmi,

persónukjör

og nýja stjórnarskráin

Áhrif nýrrar stjórnarskrár á alþingiskosningar og kjördæmi

 

Fundur í Iðnó

3. maí  kl. 20-22

Framsöguerindi og pallborðsumræður

Frummælendur:

            ⁃         Ari Teitsson, bóndi

⁃         Björn Guðbrandur Jónsson, umhverfisfræðingur

⁃         Eygló Harðardóttir, alþingismaður

⁃         Ómar Ragnarsson, fréttamaður

⁃         Stefanía Óskarsdóttir, stjórnmálafræðingur

Fundarstjóri: Sigríður Dögg Auðunsdóttir, blaðamaður á Fréttatímanum.

Þórir Baldursson tónlistarmaður leikur á Hammond-orgel.

 

- Úr frumvarpi að nýrri stjórnarskrá -

39. gr. Alþingiskosningar

Á Alþingi eiga sæti 63 þjóðkjörnir þingmenn, kosnir leynilegri kosningu til fjögurra ára.

Atkvæði kjósenda alls staðar á landinu vega jafnt.

Heimilt er að skipta landinu upp í kjördæmi. Þau skulu flest vera átta.

Samtök frambjóðenda bjóða fram lista, kjördæmislista eða landslista eða hvort tveggja. Frambjóðendur mega bjóða sig fram samtímis á landslista og einum kjördæmislista sömu samtaka.

Kjósandi velur með persónukjöri frambjóðendur af listum í sínu kjördæmi eða af landslistum, eða hvort tveggja. Honum er og heimilt að merkja í stað þess við einn kjördæmislista eða einn landslista, og hefur hann þá valið alla frambjóðendur listans jafnt. Heimilt er að mæla fyrir um í lögum að valið sé einskorðað við kjördæmislista eða landslista sömu samtaka.

Þingsætum skal úthluta til samtaka frambjóðenda þannig að hver þeirra fái þingmannatölu í sem fyllstu samræmi við heildaratkvæðatölu.

Í lögum skal mælt fyrir um hvernig þingsætum skuli úthlutað til frambjóðenda út frá atkvæðastyrk þeirra.

Í lögum má mæla fyrir um að tiltekinn fjöldi þingsæta sé bundinn einstökum kjördæmum, þó ekki fleiri en 30 alls. Tala kjósenda á kjörskrá að baki hverju bundnu sæti skal ekki vera lægri en meðaltalið miðað við öll 63 þingsætin.

Í kosningalögum skal mælt fyrir um hvernig stuðla skuli að sem jöfnustu hlutfalli kvenna og karla á Alþingi.

Breytingar á kjördæmamörkum, tilhögun á úthlutun þingsæta og reglum um framboð, sem fyrir er mælt í lögum, verða aðeins gerðar með samþykki 2/3 hluta atkvæða á Alþingi. Slíkar breytingar má ekki gera ef minna en sex mánuðir eru til kosninga, og gildistaka þeirra skal frestast ef boðað er til kosninga innan sex mánaða frá staðfestingu þeirra.

...stofnfundur nýrra stjórnmálasamtaka á sunnudag

 

Framhalds-stofnfundur nýrra stjórnmálasamtaka
á Grand hóteli sunnudaginn 18. mars 2012 kl. 14 – 17.

Dagskrá:

1. Setning fundar með stuttu ávarpi þriggja einstaklinga. Opnað fyrir stofnfélagatal og tillögur að nafni félagsins.

2. Val á fundarstjórum og riturum. Kynning dagskrár og fundarskapa.

3. Lög félagsins, afgreiðsla.

4. Kjarnastefna félagsins, afgreiðsla.

5. Hlé. Nafnatillögufrestur rennur út. Nafnanefnd taki við tillögum og búi undir kosningar.

6. Inntaka nýrra félaga áréttuð; einstaklinga. Innganga nýrra félaga lokað á uppgefnum tímapunkti. Gengið frá kjörskrá.

7. Kynning frambjóðenda til framkvæmdaráðs.

8. Kosning í framkvæmdaráð og úrskurðarnefnd. Skoðunarmenn reikninga valdir og atkvæði greidd um nafn félagsins.

9. Hlé, talning atkvæða.

10. Niðurstöður kosninga kynntar.

11. Fulltrúi nýs framkvæmdaráðs ávarpar fundinn og slítur honum.

 

... breiðfylking um lýðræði, réttlæti og almannahag...

Næsta sunnudag lýkur formlega stofnun nýrra stjórnmálasamtaka, sem gengið hafa undir vinnuheitinu breiðfylkingin (sjá hér). Fyrri stofnfundur fór fram 12. febrúar síðastliðinn og síðan hafa málefnahópar unnið af krafti í stefnumálum og lögum samtakanna.

Ekki fer á milli mála að hér verður um marktækan valkost að ræða fyrir hina mýmörgu kjósendur sem óánægðir eru með fjórflokkinn og vilja stokka almennilega upp í stjórnarfari þjóðarinnar. Hin nýju samtök verða með núverandi og fyrrverandi þingmenn í sínum röðum og ótal annað gott fólk sem undanfarin ár hafa barist hart fyrir umbótum innan hinna ýmsu væntanlegu aðildarfélaga, barist fyrir lýðræðisumbótum, fyrir alvöru skjaldborg fyrir heimilin, fyrir uppstokkun í meðferð auðlinda, fyrir siðvæðingu, fyrir réttlæti og fyrir manneskjulegra samfélagi almennt og yfirleitt, þar sem fólkið er í fyrirrúmi en ekki fjármagnið og aðrir hagsmunir forréttindastéttanna.

Hin nýju samtök eiga rætur hjá félögum og einstaklingum sem tóku þátt í Búsáhaldabyltingunni, hjá öðrum mótstöðuöflum gegn ofríki fjórflokksins og annarra elítu-afla og hjá fólki sem tók virkan þátt í því að skapa þjóðinni nýja samfélagssáttmála, nýja stjórnarskrá.  Þótt eitt og annað hafi þróast til betri vegar eftir Hrunið þá er fjölmargt ógert sem fjórflokkurinn er ekki líklegur til að standa að og deginum ljósara að fjórflokkurinn þarf virkilega öflugt og fjölmennt aðhald á löggjafarþinginu eftir næstu kosningar - og helst auðvitað líka í framkvæmdavaldinu; með aðild að næstu ríkisstjórn. Það þarf að klára tiltektina, ljúka uppstokkuninni - innleiða nýja Ísland, en moka út gamla Íslandi spillta fjórflokksins. Virkja þau gildi sem Þjóðfundirnir færðu fram.

Ég hvet alla til að kynna sér kjarnastefnu hinna nýju stjórnmálasamtaka. Hún er (með fyrirvara um einhverjar breytingar á síðari stofnfundinum næsta sunnudag):

"Breiðfylking um framboð til næstu alþingiskosninga sem leggja mun áherslu á brýna hagsmuni almennings er sammála um neðangreindan stefnuramma. Öllum sem fallast á forgang þessara mála er boðið til þátttöku.

Við leggjum áherslu á að hrinda í framkvæmd mikilvægum hagsmunamálum þjóðarinnar og að verða það breytingaafl sem íslensk stjórnmál skortir svo mjög.

Öflugar aðgerðir í þágu heimila
Leysa verður skuldavanda heimilanna með róttækum hætti og bæta aðstöðumun almennings gagnvart fjármálavaldinu. Leita skal lausna á forsendum lántakandans frekar en lánveitandans. Við viljum tafarlaust afnám verðtryggingar á neytendalánum og almenna leiðréttingu húsnæðislána. Þá viljum við að lágmarks framfærsluviðmið verði lögfest og að vextir í landinu verði hóflegir.

Lýðræðisumbætur - Ný stjórnarskrá
Ný stjórnarskrá fólksins komi sem allra fyrst til þjóðaratkvæðis. Við teljum frumvarp Stjórnlagaráðs mikilvægt skref í átt til virkara lýðræðis og að þjóðin eigi að fá að kjósa um það. Við leggjum sérstaka áherslu á að tryggja tafarlaust með lögum eftirfarandi rétt almennings: Persónukjör samhliða flokkakjöri. Kjósendur hafi rétt til að kjósa á milli einstaklinga og framboðslista. Þjóðaratkvæðagreiðslur óski 10% kjósenda þess. Íbúar kjördæma eða sveitarfélaga geti átt frumkvæði að atkvæðagreiðslu um sameiginleg hagsmunamál svæðisins óski 10% kjósenda þess. Sjálfstæði sveitarfélaga verði aukið og nálægðarreglan í heiðri höfð. Ákvarðanir verði teknar á því stjórnsýslustigi sem næst er málinu sjálfu.

Skipan auðlindamála og uppstokkun á stjórn fiskveiða
Orkufyrirtæki verði í eigu ríkis og / eða  sveitarfélaga og nýting allra náttúruauðlinda til sjávar og sveita skal vera sjálfbær. Auk þeirra breytinga sem ný stjórnarskrá að forskrift Stjórnlagaráðs hefur í för með sér fyrir skipan auðlindamála er nauðsynlegt að stokka upp stjórn fiskveiða frá grunni. Tryggja þarf aðskilnað veiða og fiskvinnslu og að jafnræði ríki meðal landsmanna við nýtingu á sameiginlegum fiskveiðiauðlindum. Hámarka skal arð þjóðarinnar af auðlindum hennar. Virða skal álit Mannréttindanefndar Sameinuðu þjóðanna. Allur ferskur fiskur skal seldur á fiskmörkuðum.

Siðvæðing stjórnsýslu og fjármálakerfis
Bæta ber siðferði og auka gegnsæi í stjórnmálum, stjórnsýslu og fjármálakerfinu. Nauðsynlegt er að þessir aðilar vinni eftir skýrum siðareglum. Lög verði yfirfarin með því markmiði að fyrirbyggja spillingu og herða viðurlög við henni. Tryggður verði aðgangur almennings að öllum gögnum sem opinberir aðilar safna eða standa straum af. Þann aðgang má aðeins takmarka með lögum í lýðræðislegum tilgangi, svo sem til að tryggja persónuvernd. Komið verði í veg fyrir óeðlileg völd sérhagsmunaaðila og skilið á milli stjórnmála og viðskiptalífs. Bankaleynd skal afnumin að undanskildu því sem lög um persónuvernd kveða á um. Tryggt verði að eftirlitsstofnanir ásamt efnahags og viðskiptanefnd Alþingis hafi ávalt fullar rannsóknarheimildir gagnvart fjármálafyrirtækjum.

Lagalegt réttlæti og afdráttarlaust uppgjör við hrunið
Gera þarf ráðstafanir til að endurheimta illa fengið fé aðalgerenda í svonefndri útrás og höfða skaðabótamál á hendur þeim. Samfélag þar sem glæpir borga sig er ekki hægt að sætta sig við. Ganga þarf sérstaklega eftir því að sinnt verði brýnum rannsóknarefnum sem ætla má að hinir gamalgrónu stjórnmálaflokkar séu tregir til að láta rannsaka. Tryggja þarf góð starfsskilyrði sérstaks saksóknara og annarra sem koma að rannsókn efnahagsbrota í tengslum við Hrunið. Almenningur hafi aðgang að öllum upplýsingum sem rannsakendur Hrunsins afla, enda séu ekki sérstök rök fyrir því að halda þeim leyndum. Öllum skal gert kleift að leita réttar sins og verjast fyrir dómstólum, óháð efnahag.

Evrópusambandið
Við leggjum áherslu á opið og lýðræðislegt ferli, óháða upplýsingagjöf og fræðslu og treystum þjóðinni til að ráða niðurstöðunni. Ef aðildarviðræðum verður ekki lokið fyrir samþykkt nýrrar stjórnarskrár og þjóðin ákveður að hætta aðildarviðræðum í samræmi við 66. grein frumvarps Stjórnlagaráðs, munum við styðja þá niðurstöðu. Að öðrum kosti verði aðildarviðræður við Evrópusambandið kláraðar og niðurstaðan borin undir þjóðaratkvæði".

Tryggjum glæstan sigur lýðræðisins!

Það gleður þennan frambjóðanda (nr. 7814) óendanlega að svo er að sjá að kosningaþátttakan í kosningunum til Stjórnlagaþings sé að stigmagnast og geti orðið svipuð og í öðrum kosningum. Niðurrifsraddir, undir stjórn sérhagsmunaafla, hafa markvisst reynt að ljúga því að kjósendum að það sé flókið, erfitt og tilgangslaust að kjósa í þessum kosningum, en það er auðvitað leið og ljót lygi.

Staðreyndin er sú að það er auðvelt og ánægjulegt að kjósa í þessum kosningum. Einna erfiðast er að velja alla 25 sem kjósa má og forðast fulltrúa sérhagsmunaafla, en um leið og kjósandinn hefur fundið þó ekki væri nema eitt nafn þá er hann tilbúinn. Tvö til fimm nöfn betra, tíu til fimmtán enn betra og alla 25 auðvitað langbest, en ekki nauðsynlegt. Og að forgangsraða er ekki mikið meira verk en að velja hvaða bragð þú vilt hafa á ísnum þínum. Bentu á þann sem þér þykir bestur. Og svo koll af kolli.

Þessi hér frambjóðandi, nr. 7814, vill meina að hann sé meðal bestu kostanna, ef kjósandinn vill aukið beint lýðræði með persónukjöri og þjóðaratkvæðagreiðslum og með skýrri aðgreiningu löggjafarvalds og framkvæmdavalds (þings og ríkisstjórnar), vill þjóðareign auðlinda, áframhaldandi þingræði (en ekki forsetaræði), vill jafnt atkvæðavægi, vill faglega skipan dómara, vill aðskilnað ríkis og kirkju, vill stjórnlagadómstól og sterkar eftirlitsstofnanir og vill ótvíræðan rétt alþýðu manna til velferðar og mannsæmandi lífs.

Sjá:

Stefna frambjóðanda 7814 í 84 sekúndna hnotskurn

Myndbandskynning frambjóðandans

Útvarpsviðtal frambjóðandans

 

Góða skemmtun á morgun - það verður beinlínis gaman að kjósa!

 

kv.

Friðrik Þór Guðmundsson

frambjóðandi nr. 7814

[e-mail]

s: 864 6365

Tæplega 10 þúsund hafa kosið

Ég er ekki á flótta

Að gefnu tilefni vil ég taka það fram að ég er ekki á flótta.

Ástæðan fyrir því að ég hef ekki skrifað hér á Mogga-blogginu lengi er að ég er enn stórhneykslaður á því að ekkjan úr Eyjum og Óskarinn hennar hafi rýrt trúverðugleika Morgunblaðsins með aldeilis fráleitri ritstjóraráðningu.

Um sinn er ég að blogga á Eyjunni, hvað sem síðar verður.

Vonandi ná fagmenn Moggans að hemja... standa upp í hárinu á... segja sannleikann þótt... eh... finna nýja ritstjóranum skaðlausan farveg...

Það vantar mann í að fara vestur að tuska þessa Kana til, til dæmis.

Íslensk kona á flótta

NÝ lög Borgarahreyfingarinnar - gjörbreytt "Tillaga A"

Það er vitaskuld ástæða til að fagna sáttatón frá nýrri stjórn Borgarahreyfingarinnar og vonandi hljómar sá tónn vel í eyru þingmanna hreyfingarinnar. Nýsamþykkt lög hreyfingarinnar eru ALLT ANNAR VERULEIKI en "frumvarp" það sem kallað var "Tillaga A" á landsfundinum og þingmennirnir hafa lagst gegn.

"Tillaga A" gekk í gegnum róttækar breytingar á landsfundinum, meðan ágætir þingmenn hreyfingarinnar sátu frammi og fylgdust því miður þar af leiðandi ekki með. "Tillaga A" er úrelt viðmiðun og held ég megi fullyrða að flest það í "frumvarpinu" sem umdeildast var hafi fallið út. Til dæmis brottrekstrarákvæði og ákvæði um að sverja eið.

Tímafrekri vinnu við að slá breytingarnar inn í yfirfarið og formlegt skjal lauk í morgun og hérna er að finna NÝ LÖG hreyfingarinnar: http://www.borgarahreyfingin.is/log-borgarahreyfingarinnar/

ATH: Nennti ekki að hafa langlokuna hér, fyrst búið var að birta hana á viðeigandi stað, sbr. slóðina.

 

Harma deilur í Borgarahreyfingunni

Sunnudagshugleiðing: Um banka og heri

 Tómas Jefferson, sá mikilsvirti frumkvöðull í Bandaríkjunum og lýðræðissinni, sagði: "Banking establishments are more dangerous than standing armies."

Þetta er umhugsunarefni dagsins...

 

Hvaða atkvæði endurspeglar best stefnu hreyfingarinnar?

Það stefnir í samþykkt frumvarps um ríkisábyrgð á Icesave-samningnum með þaulræddum fyrirvörum. Nokkuð ljóst má nú heita að fyrir svo breyttu frumvarpi er meirihluti, hvernig svo sem þingmenn Borgarahreyfingarinnar greiða atkvæði. Vert er að velta því fyrir sér, hvort það er meira eða minna í anda stefnu og kosningaloforða Borgarahreyfingarinnar að greiða atkvæði með eða á móti fyrirvörunum og frumvarpinu. Er með góðu móti hægt að segja að það liggi fyrir?

Það sýnist mér ekki. Allir þeir fjórir þingmenn sem náðu kjöri til þings af listum Borgarahreyfingarinnar hafa að vonum gagnrýnt Icesave-samninginn harðlega. Þrír þeirra, þau sem mynda nú þinghóp hreyfingarinnar, munu að líkindum samþykkja fyrirvarana, en óvíst er með Þráinn Bertelsson, sem flutti mergjaða ræðu gegn Icesave-samningunum í gær. Þeirri spurningu hvort betra sé samkvæmt stefnu hreyfingarinnar að samþykkja eða fella ríkisábyrgðina treysti ég mér ekki til að svara.

Ég get hins vegar nefnt, að það er engan veginn reglan að allir þeir fjórir þingmenn sem kjörnir voru af listum hreyfingarinnar hafi greitt atkvæði á þinginu með samræmdum hætti. Eina tilvikið sem eitthvað hefur verið rætt í því sambandi er atkvæðagreiðslan um ESB-viðræður (og breytingatillöguna um tvöfalda atkvæðagreiðslu). Þór, Birgitta og Margrét greiddu þar atkvæði með öðrum hætti en Þráinn og óþarfi að rekja það nánar.

En skoðum nokkrar aðrar atkvæðagreiðslur þessara þingmanna:

Í atkvæðagreiðslu 11. ágúst um 114. mál. kjararáð o.fl. (ákvörðunarvald um launakjör forstöðumanna): Nei: Birgitta Jónsdóttir, Margrét Tryggvadóttir, Þór Saari. Fjarstaddur: Þráinn Bertelsson.

Í atkvæðagreiðslu 11. ágúst um 124. mál. Bankasýsla ríkisins: Nei: Birgitta Jónsdóttir, Margrét Tryggvadóttir. Sat hjá: Þór Saari. Fjarstaddur: Þráinn Bertelsson.

Í atkvæðagreiðslu 11. ágúst um 89. mál. breyting á ýmsum lögum vegna tilfærslu verkefna innan Stjórnarráðsins (1. grein): Já: Margrét Tryggvadóttir, Þór Saari, Þráinn Bertelsson, Sat hjá: Birgitta Jónsdóttir.

Í atkvæðagreiðslu 24. júlí um Bankasýslu ríkisins, 2.-10. grein: Nei: Birgitta Jónsdóttir, Margrét Tryggvadóttir, Sátu hjá: Þór Saari, Þráinn Bertelsson.

Í atkvæðagreiðslu 24. júlí um Bankasýslu ríkisins, 1. grein: Nei: Birgitta Jónsdóttir, Margrét Tryggvadóttir, Þór Saari, Sat hjá: Þráinn Bertelsson.

 

Í atkvæðagreiðslu 24. júlí um Bankasýslu ríkisins, breytingatillögur 289 (1 og 2): Já: Birgitta Jónsdóttir, Margrét Tryggvadóttir, Sat hjá: Þór Saari, Nei: Þráinn Bertelsson.

 

Í atkvæðagreiðslu 24. júlí um 114. mál. kjararáð o.fl. (ákvörðunarvald um launakjör forstöðumanna), 1. grein: Nei, öll fjögur.

 

Í atkvæðagreiðslu 10. júlí um 1. mál. endurskipulagning rekstrarhæfra atvinnufyrirtækja (stofnun hlutafélags, heildarlög): Já: Birgitta Jónsdóttir, Margrét Tryggvadóttir, Þór Saari, Sat hjá: Þráinn Bertelsson.

Í atkvæðagreiðslu 10. júlí um 85. mál. fjármálafyrirtæki (sparisjóðir): Já: Þór Saari, Sátu hjá: Birgitta Jónsdóttir, Margrét Tryggvadóttir, Þráinn Bertelsson.

Í atkvæðagreiðslu 29. júní um 118. mál. ráðstafanir í ríkisfjármálum (breyting ýmissa laga): Nei: Birgitta Jónsdóttir, Margrét Tryggvadóttir, Valgeir Skagfjörð. Í leyfi: Þráinn Bertelsson.

Í atkvæðagreiðslu 26. júní um 118. mál. ráðstafanir í ríkisfjármálum (breyting ýmissa laga), bráðabirgðaákvæði II-VII: Sátu hjá: Öll fjögur (Valgeir fyrir Þór).

Í atkvæðagreiðslu 26. júní um 118. mál. ráðstafanir í ríkisfjármálum (breyting ýmissa laga), bráðabirgðaákvæði I: Já: Birgitta Jónsdóttir, Sátu hjá: Margrét Tryggvadóttir, Valgeir Skagfjörð, Þráinn Bertelsson.

Í atkvæðagreiðslu 18. júní um 34. mál. stjórn fiskveiða (strandveiðar): Já: Birgitta Jónsdóttir, Margrét Tryggvadóttir, Þór Saari. Sat hjá: Þráinn Bertelsson.

Í atkvæðagreiðslu 29. maí um 33. mál. fjármálafyrirtæki (heimild til útgreiðslu úr þrotabúum gömlu bankanna): Nei: Birgitta Jónsdóttir, Þór Saari. Fjarstödd: Margrét Tryggvadóttir, Þráinn Bertelsson.

Í atkvæðagreiðslu 28. maí um 56. mál. olíugjald og kílómetragjald og gjald af áfengi og tóbaki o.fl. (hækkun gjalda): Nei: Öll fjögur.

 

Á þessari upptalningu sést að það hafa verið meiri líkur á því en minni að þingmennirnir fjórir greiði atkvæði með ólíkum hætti. Vildi fyrst og fremst nefna þetta þegar menn ræða hvaða þingmenn fylgja stefnu og kosningaloforðum hreyfingarinnar vel eða illa. Eins er rétt að spyrja á þessum tímapunkti: Hvernig eiga þingmenn að greiða atkvæði um ríkisábyrgðina og fyrirvarana við Icesave-samninginn til að uppfylla best stefnu og kosningaloforð Borgarahreyfingarinnar?

17 á mælendaskrá um Icesave

Hvimleið og uppblásin átök

Mér sýnist deginum ljósara að ágreiningurinn milli ákveðinna persóna innan Borgarahreyfingarinnar sé ákaflega erfiður viðureignar og þá fyrst og fremst vegna þess hversu persónulegur hann hefur orðið. Það er ekki minnsti ágreiningur um stefnu og málefni, að því frátöldu að "fyrir margt löngu" þótti mörgum í hreyfingunni að þrír þingmenn hennar hefðu greitt atkvæði með röngum hætti - og um það mátti að sjálfsögðu deila.

Mér finnst hins vegar að yfirstandandi deilur séu uppblásnar og ótímabærar. Mér líður eins og að langhlaupari sé að detta nokkrum skrefum áður en hann kemst í mark. 137. löggjafarþinginu, sumarþinginu, er að ljúka og sömuleiðis stjórnartíma núverandi stjórnar hreyfingarinnar. Framundan er sumarhlé þingsins fram í október og eftir innan við mánuð verður haldinn aðalfundur (landsfundur) Borgarahreyfingarinnar, þar sem meðal annars verður kosin ný stjórn. Þess utan hefur félagsfundur (grasrótin) tekið þá afstöðu að senda á vettvang sáttanefnd til að miðla málum innan þinghópsins og milli þinghóps og stjórnar. 

Það á að mínu viti að leyfa öllum núverandi þingmönnum hreyfingarinnar að vinna sín þingstörf í friði á þeim litla tíma sem eftir er af sumarþinginu og ekki síst taka þátt í að leysa þetta Icesave-mál, sem er þjóðinni mun mikilvægara mál en tímabundinn ágreiningur milli einstaklinga í einni stjórnmálahreyfingu. Um leið á stjórnin að einbeita sér að því að skipuleggja komandi aðalfund í nánu samstarfi við þá vinnuhópa sem á óeigingjarnan hátt hafa valist til að undirbúa stefnumál, skipulag og framtíðarvinnu hreyfingarinnar. En umfram allt á að treysta á sáttanefndina að vinna sín störf - bæði stjórn og þinghópur verða að vera þess minnug að félagsfundur - grasrótin - sendi þessa sáttanefnd á vettvang og það er enda skýr vilji félaganna að einstaklingarnir innan stjórnar og þinghóps láti af illdeilum og friðmælist, hið minnsta fram að því að innanflokksmálin geta komið til umræðu og lausnar á formlegum aðalfundi eftir innan við mánuð.

Allt tal um að skipta út þingmönnum er ótímabært og í rauninni óviðeigandi - af því að sumarþingi er að ljúka, aðalfundur framundan og sáttanefnd grasrótarinnar að störfum.  Eftir innan við mánuð verður tekin við ný stjórn hreyfingarinnar og þá verða tekin í gildi ný og í reynd fyrstu lög og verklagsreglur hreyfingarinnar, svo sem varðandi þingmenn og störf þeirra. Og þá verður vinna sáttanefndar vonandi búin að skila árangri. Slíðrum sverðin í millitíðinni. Í mánuð.

Einbeitum okkur að Icesave

Um klofninga og ágreining

 

Lítum á staðreyndir. Hver og einn einasti stjórnmálaflokkur á Íslandi hefur upplifað djúpan ágreining og klofning. Án undantekninga. Þar sem 2-3 Íslendingar koma saman, þar verður ágreiningur og klofningur. Því hjartnæmari sem málstaðurinn er þeim mun líklegri er klofningur.

Sjálfstæðisflokkurinn hefur klofnað. Framsóknarflokkurinn hefur klofnað. Alþýðuflokkurinn klofnaði. Alþýðubandalagið klofnaði. Samfylking, VG og Frjálslyndir. Flestallir "litlu" flokkarnir hafa klofnað út frá "stóru" flokkunum og hafa síðan klofnað. Flestöll félög lenda í ágreiningi og klofna. Þjóðin er klofin í stjórnmálum. Hún er klofin í trúmálum. Alls staðar er verið að rífast og skammast, menn að segja sig úr félögum og samtökum og stofna ný - sem klofna. 

Aftur: Þar sem 2-3 Íslendingar koma saman, þar verður ágreiningur og klofningur.

Ágreiningurinn innan Borgarahreyfingarinnar, milli stjórnar og þinghóps og klofningurinn í tvo arma innan þinghópsins - kemur mér ekki á óvart. Borgarahreyfingin er lausbeisluð hreyfing um fáein kjarnamál, nýstofnuð hreyfing sem hvorki hefur komið sér upp hefðum né samþykktum lögum (verklagsreglum) sem virka. Hreyfingin samanstendur í raun af fólki með ærið ólík viðhorf til ýmissa mála sem ekki eru með beinum hætti í stefnuskrá hreyfingarinnar. Þarna kom saman fólk með ýmsar stjórnmálaskoðanir til tímabundins átaks gegn spilltu flokksræði og flokkakerfi, vegna hrunsins og illrar meðferðar á alþýðu þessa lands. Fólk sem annars hefur ýmsar skoðanir á t.d. Evrópumálum, kvótamálum, stóriðjumálum, trúmálum, NATO, flugvallamálum, hlutverki hins opinbera, einkavæðingarmálum o.s.frv. Margir í hreyfingunni eiga fátt sameiginlegt nema andófið vegna hrunsins, mótmælin gegn meðferðinni á þjóðinni og óskina um aukið lýðræði og betra Ísland.

En þótt ágreiningur og klofningur séu nánast óhjákvæmilegur fylgifiskar félaga og samtaka þá blasir það einnig við að í flestum tilvikum hafa viðkomandi hópar nógu mikinn félagslegan þroska til að takast á við vandann og leysa hann. Ágreiningurinn innan Borgarahreyfingarinnar nú er að stórum hluta til persónulegur ágreiningur milli manna í stjórn og þinghópi Borgarahreyfingarinnar. "Grasrótin" kom saman á félagsfundi í gærkvöldi og þar voru skoðanir vissulega skiptar um eitt og annað, en málin rædd að niðurstöðu - og menn héldu sáttir heim. Allnokkrar tillögur og ályktanir voru samþykktar; allar samhljóða, en ein felld. Fólkið "á gólfinu" gáfu bæði stjórninni og þinghópnum (báðum "örmum") gula spjaldið, samþykkti verklagsreglur fyrir þau og setti á laggirnar sáttanefnd til að ganga á milli og stilla til friðar. Ég ætla að vona að vel verði tekið á móti sáttanefndinni og verklagsreglunum. Að menn geti unnið saman á ný og síðan styrkt starf hreyfingarinnar frá og með aðalfundi 12.-13. september.

Annars verð ég að kenna nemendum mínum þetta um sögu Borgarahreyfingarinnar á næsta vormisseri: Borgarahreyfingin fæddist í febrúar 2009. Bauð sig fram og fékk 4 þingmenn í apríl 2009. Dó í ágúst 2009.

Enginn þingmaður mætti